အနွံ ၃၂
တၢ်လိၣ်ဘၣ်
သုတန့ၢ်ဘၣ်တၢ်ဘၣ်. အဂ့ၢ်ဒ်အံၤ, သုတဃ့ဘၣ်တၢ်ဘၣ်.
ယၤကိာ် ၄:၂ခ
ဘိးဘၣ်သ့ၣ်ညါ ယွၤလၢသုတၢ်အဲၣ်ဒိးတဖၣ်န့ၣ်တက့ၢ်.
ဖံလံးပံၤ ၄:၆ခ
မုၢ်အိၣ်ဘှံးနံၤတနံၤ, ယလဲၤဆူယအိၣ်ဘှံးနံၤတၢ်မၤလိအဒၢး ဒီးယစု ပူၤအိၣ်ပှဲၤဒီး လံာ်သ့ၣ်တဖၣ်, ခီၣ်ဖၠူၣ်ထၢၣ်, စဲးဒုးနဲၣ်တၢ်ဂီၤ, လီခီ, ထံခွး, တၢ်အီၣ်ကစဲးကစီးတဖၣ်လီၤ. ယတၢ်မၤလိဖိတဖၣ်အိၣ်လၢ ဖဲန့ၣ်ဘၣ်ဆၣ် တဟဲစိာ်စၢၤယၤယတၢ်ဝံဃၢတဖၣ်ဘၣ်. ယပာ်ဖျါ ယတၢ်ကဒူးကဒ့ၣ်တဖၣ်ဆူယကညီတံၤသကိးတဖၣ်အအိၣ်ဒ်အံၤ, ‘‘တၢ်ဖိသၣ်လၢဟဲဒိၣ်ထီၣ်လၢအမဲရကၤတဖၣ်န့ၣ်အသးတဖးတဆး ဘၣ်.’’ အဝဲသ့ၣ်ဘၣ်အသးလၢယၤလီၤ. လၢခံအနွံတဖၣ်စ့ၢ်ကီး ပှၤ တဟဲမၤစၢၤယၤဘၣ်. ဖဲန့ၣ် ယကဒူးကဒ့ၣ်ကဒီး ဒီးယတဲဘၣ် ယတံၤသကိးလၢတမ့ၢ်ပှၤကညီလီၤ. အဝဲစံးဆၢယၤဖုၣ်ဖုၣ်ဖိ, ‘‘လၢ ခံတဘျီ, နသံကွၢ်အဝဲသ့ၣ်လၢကစိာ်စၢၤနၤတၢ်မီၤ.’’ လၢခံတနွံမုၢ် အိၣ်ဘှံးနံၤ, ယပာ်ဖျါထီၣ်ယတၢ်လိၣ်ဆူဖိသးစၢ်တဖၣ်လၢကမၤစၢၤ ယၤလီၤ. အဝဲသ့ၣ်ခဲလၢာ်ဟဲမၤစၢၤယၤလီၤ. ယစံးဘျုးစံးဖှိၣ် အဝဲ သ့ၣ်ဒီးယဃ့အဝဲသ့ၣ်လၢကမၤစၢၤယၤ လၢနွံလၢအကဟဲတဖၣ်လီၤ. စးထီၣ်ဖဲန့ၣ်တၢ်ကီတၢ်ခဲလၢယဘၣ်စိာ်တၢ်ဃၢဆူယတၢ်မၤလိအဒၢး တအိၣ်လၢၤဘၣ်. အါစုအါဘျီ, ဖဲပတၢ်လိၣ်ဘၣ်တဖၣ်တဘၣ်တၢ် မၤလၢပှဲၤအီၤအခါန့ၣ်, လၢပကပာ်ဖျါထီၣ်ပတၢ်လိၣ်ဘၣ်တဖၣ်လၢ ကျဲလၢအဘၣ်အလီၢ်န့ၣ်, ပအဲၣ်ဒိးမၢပှၤဖးပတၢ်လိၣ်တဖၣ်လၢပတ ဘိးဘၣ်သ့ၣ်ညါပှၤ ဒီး ပသးအုးသးဒိၣ် ကဒူးကဒ့ၣ်တၢ်လီၤ. လံာ်စီ ဆှံအဆၢတဖၣ်လၢထးဟ့ၣ်ဂံၢ်ဟ့ၣ်ဘါ ပှၤလၢပကဘိးဘၣ်သ့ၣ်ညါ ယွၤလၢပတၢ်လိၣ်တဖၣ်လီၤ. လၢပတၢ်ရ့လိာ်မုာ်လိာ်သကိးသကိး အပူၤစ့ၢ်ကီး, ပကဘၣ်ဒုးသ့ၣ်ညါလိာ်သး လၢပတၢ်လိၣ်တဖၣ်လီၤ. တၢ်ပာ်ဖျါဒုးသ့ၣ်ညါ ပတၢ်လိၣ်မ့ၢ်တၢ်အရ့ဒိၣ် လၢကမၤဆူၣ်ထီၣ် ပတၢ်ရ့လိာ်မုာ်လိာ်န့ၣ်လီၤ.
ကစၢ်ဧၢ, သိၣ်လိပှၤလၢပကသ့ၣ်ညါပတၢ်လိၣ်နီၢ်ကီၢ်တဖၣ်ဒီး ပကပာ်ဖျါထီၣ်အီၤဆူနအိၣ်ဒီးပှၤအဂၤလၢတၢ်ပာ်ကဲန့ၣ်တက့ၢ်. လၢခရံာ်မံၤ ယဃ့နၤလီၤ. အၤမ့ၣ်.