အနွံ ၁၅
ဟံးဃာ်ပသးလၢတၢ်မူအပူၤ
ပပၢ်ကစၢ်ယွၤဒုးလဲၤဖျိပှၤမ့ၣ်အူဒီးထံဝံၤဒုးဟဲထီၣ်ပှၤဆူတၢ်အါအလီၢ်
စံးထီၣ်ပတြၢၤ ၆၆:၉(က) – “ဟံးဃာ်ပသးလၢတၢ်မူအပူၤ”
ပစံးဘျုးပပၢ်ကစၢ်ယွၤ လၢအဆှၢခီဖျိပှၤလၢပတၢ်အိၣ်မူအပူၤလီၤလိၢ်လီၤလးအဃိလီၤ. ယသးအိၣ်အုၣ်ယသးလၢ ယပှၤဟံၣ်ဖိ ဃီဖိဒီးယပှၤကလုာ်လၢ ပတၢ်လဲၤခီဖျိကီကီခဲခဲလၢ ဒဲကဝီၤတဖၣ်အပူၤအဂ့ၢ်တနီၤမ့ၢ်ဒ်လာ်အံၤအသိးန့ၣ်လီၤ. အဆိယသးအိၣ် ဟ့ၣ်နီၤလီၤလံာ်စီဆှံဖိသၢတီၤလၢယဒိးန့ၢ်ဘၣ်အီၤ ခီဖျိပှၤလၢယအဲၣ်ဒိၣ်မးအကျါသၢဂၤလၢအလဲၤပူၤကွံာ်ဟီၣ်ခိၣ်အံၤန့ၣ်လီၤ. ယပါသရၣ်ဒိၣ်ကၠီန့ၢ်ထူဟ့ၣ်ယၤလံာ်စီဆှံအဆၢ ရိမ့ၤ ၁၂:၁၂ – “လၢတၢ်မုၢ်လၢ်အပူၤန့ၣ်သးခုတက့ၢ်. လၢတၢ်နးတၢ်ဖှီၣ်အပူၤ န့ၣ်ဝံသးစူၤတက့ၢ်. လၢတၢ်ထုကဖၣ်အဂ့ၢ်န့ၣ်မၤသပှၢ်ပှၢ်တက့ၢ်.” ယမိသရၣ်မုၣ်စတါရ့ၣ်ထူ ဟ့ၣ်ယၤလံာ်စီဆှံအဆၢ ကတိၤဒိ ၃၁:၃၀(ခ) – “ပိာ်မုၣ်လၢအပျံၤယွၤန့ၣ်တၢ်ကစံးထီၣ်ပတြၢၤအီၤလီၤ.” ယသးသမူအတံၤသကိး သရၣ်ဒိၣ်ဒီးကထၢၣ်စဲမၢၣ် ဟ့ၣ်ယၤ လံာ်စီဆှံအဆၢ ကတိၤဒိ ၃:၅(က) “သန့ၤနသးလၢယွၤလၢနသးဒီဖျၢၣ်ညါတက့ၢ်.” အဝဲမၢပတဲဘၣ်အပှၤကလုာ်ခဲလၢာ် လၢ(ပာ်ယွၤလၢနီၢ်ဂံၢ်တၢ)ဖဲအသးသမူတချုးက့ၤထီၣ်ဆူယွၤအအိၣ်ဒံးဘၣ်အခါလီၤ. ပှၤလၢယအဲၣ်တဖၣ်လဲၤပူၤကွံာ်ယၤ ဘၣ်ဆၣ် လံာ်စီဆှံအဆၢဖိလၢဟ့ၣ်တ့ၢ်ယၤအံၤကဲထီၣ် တၢ်စုကဝဲၤ, တၢ်ဂံၢ်တၢ်ဘါဒီးတၢ်စိကမီၤဖးဒိၣ်လၢစိာ်ခီယၤ တနံၤဘၣ်တနံၤန့ၣ်လီၤ.
တၢ်လဲၤခီဖျိလၢယအဲၣ်ဒိးတဲတနီၤမ့ၢ်ဝဲတၢတခါဖဲ လါယူၤလံ ၁၉၉၁နံၣ် ကလံၤမုၢ်လီၤထံဒိၣ်တုၤတၢ်ဟးမူၤဟးဂီၤခဲလၢာ်ဘၣ်ဆၣ် ပတံၤသကိးလၢကီၢ်ချၢသ့ၣ်တဖၣ်ဆှၢဃီၤတိၢ်မၤဘူၣ်လၢ တၢ်ပှ့ၤက့ၤတၢ်အီၣ်မ့ၢ်ဂ့ၤ, လံာ်လဲၢ်ဒီးတၢ်ပီးတၢ်လီလၢ အဟးဂီၤသ့ၣ် တဖၣ်အဂီၢ်န့ၣ်လီၤ. ခံခါတခါမ့ၢ်ဝဲ လါယနူၤအါရံၤ ၂၉သီ ၁၉၉၇နံၣ် ပအိၣ်လၢဘၣ်ကီဘၣ်ခဲဒဲကဝီၤပူၤဒၣ်လဲာ် ဒုၣ်ဒါ ခိၣ်ဖၢၣ်ဘီ သ့ၣ်တဖၣ်ဟဲဒီးခး ပမဲၢ်လးဒဲကဝီၤဒီးတၢ်ဒုးကဲထီၣ်အသးတစိၢ်တလီၢ်လီၤ. ဖဲန့ၣ်သးသမူလုၢ်ဒိၣ်ပှ့ၤဒိၣ်ခံဖျၢၣ် ဘၣ်ယူၤထီၣ်ခီဖျိ ကျိဖးဒိၣ်အချံဘၣ်အဃိန့ၣ်လီၤ. သၢခါတခါဖဲ လါအ့ဖြ့ၣ် ၂၈သီ ၂၀၁၂နံၣ် မ့ၣ်အူအီၣ်ပခ့ၣ်ခ့ၣ်ဘံၣ်ဘံၣ်အဲးစံၣ် လံာ်စီဆှံကၠိခဲလၢာ် ဒီးတၢ်မနုၤမးတအိၣ်တ့ၢ်လၢၤဘၣ်. တၢ်လၢပပာ်ဖှိၣ်လၢဟီၣ်ခိၣ်သ့ၣ်တဖၣ်ဟးဂီၤလီၤမၢ်ကွံာ်ဝဲဘၣ်ဆၣ် ယွၤအဘျုးအဖှိၣ်အဃိ သးသမူတလီၤမၢ်နီတဖျၢၣ်ဘၣ်. လွံၢ်ခါတခါ လါအီကၢးစ် ၂သီ ၂၀၁၅နံၣ် ကစၢ်ယွၤကိးက့ၤအဖိခွါ သရၣ်ဒိၣ်ဒီးကထၢၣ်စဲမၢၣ် ပာ်တ့ၢ်အကၠိလံာ်စီဆှံလၢအအဲၣ်ဝဲ, အပှၤကလုာ်လၢအဲၣ်ဝဲ, အပှၤဟံၣ်ဖိလၢအဲၣ်ဝဲတဖၣ်လၢ တၢ်မံသူၣ်မံသးအပူၤလီၤ. ပဝဲဟံၣ်ဖိ ဃီဖိတၢ်အဲၣ်အပျံၤထီၣ်တဲာ်လၢပဂီၢ်, ပဘၣ်အိၣ်သယုၢ်သညိ, ဘၣ်မၤတံၤသကိးဒီးမဲာ်ထံလၢမုၢ်နၤလၢမုၢ်ဆါလီၤ. စံးဘျုးဘၣ်မိၢ် ပၢ်, ခိၣ်နၢ်, ဒီပုၢ်ဝဲၢ်လၢဟီၣ်ခိၣ်ဒီဖျၢၣ်ထုကဖၣ်လၢပဂီၢ်, ဆှၢလီၤတၢ်မၤမုာ်တၢ်မၤဘူၣ်တဖၣ်အါအါဂီၢ်ဂီၢ်အဃိ, မ်ယွၤဆိၣ်ဂ့ၤ ကိးဂၤဒဲးသုတက့ၢ်. ယဲၢ်ခါတခါ လါယနူၤအါရံၤ ၂၅သီ ၂၀၁၇နံၣ် ကစၢ်ယွၤဆှၢယၤဆူအမဲရကၤလီၤ. မဲာ်ထံဖိယွၤလီၤကဒီးခီဖျိ လၢယထံၣ်ဘၣ်က့ၤ ဖိလံၤလၢ ခ့ၣ်ခ့ၣ်ဘံၣ်ဘံၣ်အဲးစံၣ်တနီၤ, ဒီးလၢအ့စ့ၣ်လံာ်စီဆှံကၠိဖိတနီၤ လၢဟဲကဲထီၣ်ဘၣ် ခိၣ်နၢ်ဖးဒိၣ်လၢ ကီၢ်အမဲရကၤအပူၤအါဂၤ, ဃုာ်ဒီး တၢ်အိၣ်ဖှိၣ်ဖိလၢခ့ၣ်ခ့ၣ်ဘံၣ်စံၣ်တဖၣ်, ဒီးအဝဲသ့ၣ်သးခုလၢတူၢ်လိာ်မုာ်ယၤအဃိလီၤ. ခဲအံၤ ယအိၣ်လၢ အၣ်ခဲၣ်န်စီလၢ ယဖိမုၣ်စၢၤသီဖိ, ဖိဆံး, ခၠးကူကူၣ်ဖိအဟံၣ်လီၤ. ခၠးကူကူၣ်အမိအပါလဲၤတၢ်မၤဂီၤဂီၤဒီး ယအိၣ်လၢ လီၢ်မံခိၣ်တၢ်သယုၢ်သညိ, သူၣ်ဃၢသးဃၢလီၤ. ယပၢၢ်ထီၣ်တန့ၢ်ဘၣ်အခါ ခၠးကူကူၣ်ယလံၤမုၣ် ၃နံၣ်ဘျဲၣ်ဖိ ဂဲၤဆၢထၢၣ် ဟဲဃ့ၢ်လၢယဒၢးပူၤ, အခီၣ်ဖိသီၣ်ထီၣ်, အကလုၢ်သီၣ်ထီၣ် ‘‘ဖံဖံထူ’’ တဘျီဃီ ယသူၣ်ဖှံသးညီတၢ်ဝံဃၢတဖၣ်ဟါမၢ်ခဲလၢာ်လီၤ. ယဂဲၤဆၢထၢၣ်စိာ်ထီၣ်အီၤ, နၢမူအီၤ, အီၣ်သကိးမ့ၤကၠီၣ်ဒီးဆီဒံၣ်ကိးဂီၤဒဲးလီၤ. ပဘါယွၤ, ယမၢအရူးလံာ်စီဆှံ, သးဝံၣ်တၢ်သးဝံၣ်, ဟူးဂဲၤသူၣ်ဖှံသးညီဒီနံၤညါလီၤ. တဘျီတခီၣ်ယဟီၣ်ခူသူၣ်အခါ အဝဲကွၢ်နံၤဘၣ်ယၤအဃိ ယံာ်ယံာ်ယဟီၣ်တဘူၣ်လၢၤဘၣ်. ယဆိမိၣ်ထီၣ် ကစၢ်ယွၤထွါကွံာ်ပမဲာ်ထံလၢကျဲအါဘိလီၤမးလဲၣ်. ခဲအံၤယလံၤဖိအိၣ်အါထီၣ်ခံဂၤ, သီသီဖိခွါဖိတဂၤ, ဒီးဖီဖီဖိမုၣ်ဖိ တဂၤလီၤ. ယမၤန့ၢ်ကဒီးတၢ်မၤလိလၢဖိသၣ်ဆံးဆံးဖိ မ့ၢ်လိၣ်တၢ်တမံၤမံၤ ဘၣ်ဟီၣ်သီၣ်ထီၣ်ဝဲဒီး အမိၢ်ဒုးအိနုၢ်ဒီးအိၣ်ဘှီၣ်က့ၤ လီၤ. ဒ်န့ၣ်အသိးလၢယတၢ်အိၣ်မူလဲၤခီဖျိအံၤအပူၤ ယသ့ၣ်ညါပလၢၢ်ဘၣ်လၢ ကစၢ်ယွၤဟံးဃာ်ယသးလၢတၢ်မူအပူၤဒီး ဒုးသးခုယၤလၢကျဲလၢ ဟီၣ်ခိၣ်ဖိဟ့ၣ်ယၤတသ့ဘၣ်န့ၣ်လီၤ.
သရၣ်မုၣ်တၢ်ဘျုးထူ (မိထူ)
လၤမါ, အၣ်ခဲၣ်န်စီ
တၢ်ဆိကမိၣ်ထံမၤဘၣ်ထွဲက့ၤတၢ်ဟ့ၣ်ဂံၢ်ဟ့ၣ်ဘါလၢပတၢ်အိၣ်မူ
ပှၤကိးဂၤဒဲးကလဲၤခီဖျိဘၣ် တၢ်လီၤမၢ်တဖၣ်လၢအတၢ်အိၣ်မူပူၤန့ၣ်လီၤ. ပတၢ်အိၣ်တၢ်ဆိးလီၤမၢ်, ပတၢ်ဖိတၢ်လံၤဟးဂီၤ, ပပျံၤပဒုၣ်ပဒါ ကျိချံမျီၣ်သၣ်, ဒီး အဒိၣ်ကတၢၢ်ပှၤလၢပအဲၣ်တဂၤလဲၤပူၤကွံာ်ပှၤအကတီၢ်န့ၣ် ပကသ့ၣ်နီၣ်ထီၣ်လၢ ကစၢ်ယွၤ ဟံးဃာ်ပသးလၢတၢ်မူအပူၤဒီး ပတၢ်ကိၢ်တၢ်ဂီၤသ့ၣ်တဖၣ်ကဲထီၣ်က့ၤလၢတၢ်မၤမုာ်ဒီး တၢ်ဟ့ၣ်ဂံၢ်ဟ့ၣ်ဘါပှၤတခီန့ၣ်လီၤ. ပကဘၣ်မ့ၢ်ပှၤဟ့ၣ်ဂံၢ်ဟ့ၣ်ဘါပှၤအဂၤတဖၣ်, လီၤဆီဒၣ်တၢ်လၢပဖိဆံးသ့ၣ်တဖၣ်လီၤ. ပကအဲၣ်ပဖိဆံးဖိတဖၣ်ဘိၣ်ဘံဃာ်အီၤ လၢထူကလုၢ်ယွၤကထါ ဒီးပကထုကဖၣ်လၢ အဝဲသ့ၣ်အဂီၢ် ဆူၣ်ဆူၣ် ‘‘ဒ်သိး ပဖိခွါကဖိၣ်သၣ်ခွါထီၣ် ဒ်သ့ၣ်ဖိလၢအဒိၣ်ထီၣ် အသိးန့ၣ်, ဒ်သိးပဖိမုၣ်ကမၤသးဒ်လၢၢ်နၢၣ်စိးပျၤအသးလၢ ပှၤမၤနူၢ်ဧိၤစီၤဧိၤအဂီၢ်အသိးန့ၣ်’’ လီၤ. (စံးထီၣ်ပတြၢၤ ၁၄၄:၁၂)
ကစၢ်ယွၤကလုၢ်ကထါသၢတီၤဖိမၤမုာ်ဟ့ၣ်ဂံၢ်ဟ့ၣ်ဘါက့ၤမိထူအသိးန့ၣ် လံာ်စီဆှံလၢအဟ့ၣ်ဂံၢ်ဟ့ၣ်ဘါနၤမ့ၢ်မနုၤတဖၣ်လဲၣ်. ဒ်မိထူဒိးန့ၢ်ဘၣ်တၢ်မၤမုာ်ထီၣ်က့ၤအီၤခီဖျိအလံၤမုၣ်လံၤခွါဖိအသိးန့ၣ်, လၢနဂီၢ်န့ၣ် နဒိးန့ၢ်ဘၣ်တၢ်မၤမုာ်နၤ လၢကျဲဒ်လဲၣ်.
ယွၤအတၢ်မၤလီၤလးလၢနတၢ်လဲၤခီဖျိတဖၣ်အဃိ နအုၣ်နသးလၢယွၤအလၤကပီၤအဂီၢ်လံဧါ.
တၢ်ထုကဖၣ်လၢပှၤဖးတၢ်ဖိအဂီၢ်
အိၣ်လၢမူခိၣ်ပပၢ်ဧၢ, တၢ်ဟ့ၣ်ဂံၢ်ဟ့ၣ်ဘါတၢ်အုၣ်သးဖိလၢ နဖိတဂၤဖးဘၣ် ဝဲအံၤ မ်ကမ့ၢ်တၢ်မၤမုာ်ခူသူၣ်ဒီး ကတိၤကသွံတၢ်ဒီးနဖိအံၤန့ၣ် မ့ၢ်ယတၢ် ထုကဖၣ်လၢအဂီၢ်လီၤ. ယဃ့ဘါထုကဖၣ်လၢ နကမ့ၢ် တၢ်မၤမုာ်ထီၣ်က့ၤ ကစၢ်လၢ အဂီၢ်ဒ်နမၤမုာ်တ့ၢ်ယသးခီဖျိ ယလံၤမုၣ်လံၤခွါဖိသၢဂၤဒီး တံၤသကိးဖိလံၤအါဂၤ အတၢ်အဲၣ် တၢ်ထုကဖၣ်လၢယဂီၢ်အသိးန့ၣ်လီၤ. နဖိအံၤအတၢ်အိၣ်မူလဲၤခီဖျိ ဘၣ်တၢ်လၢအတူၢ်ဝဲတန့ၢ်မ့ၢ်အိၣ်မ့ၢ်ဂ့ၤ, တၢ်လီၤမၢ်ဖးဒိၣ်လၢ အတၢ်အိၣ်မူပူၤမ့ၢ်ဂ့ၤ, ဝံသးစူၤပျဲလီၤကလူးဖိလၢ ကကဲထီၣ် တၢ်မၤမုာ်ထီၣ်က့ၤအီၤ ဒ်သိးမုၢ်ကအိၣ်ဝဲတနံၤ လၢနဖိတဂၤအံၤ ကအုၣ်ဘၣ်အသးဒီး ကဒုးသ့ၣ်ညါပှၤအဂၤလၢ ယွၤအတၢ်မၤလီၤလး လၢအတၢ်အိၣ်မူလဲၤခီဖျိအပူၤန့ၣ်တက့ၢ်. လၢနဖိခွါကစၢ်ယ့ၣ်ၡူး ခရံာ်အမံၤ ယဃ့နၤလီၤ. အၤမ့ၣ်.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Week 15
PRESERVE OUR LIFE AMONG THE LIVING
God let us go through the fire and the waters and bring us to the place of abundance.
Psalm 66:9(a) – “Preserve our life among the living.” (NIV)
We praise God for miraculously delivering us through difficult life experiences. I want to share my testimony regarding the challenging ordeals I experienced. But, first and foremost, I would like to share three scriptures given to me by the three people I love dearly, who are no longer on this earth. My father, Rev. Johnny Htoo, gave me Romans 12:12 – “Be joyful in hope, patient in affliction, faithful in prayer.” My mother, Thramu Starry J. Htoo, gave me Proverbs 31:30(b) – “…a woman who fears the Lord is to be praised.” And my life partner, Dr. Simon, gave me Proverbs 3:5(a) – “Trust in the Lord with all your heart.” Right before he went home to be with the Lord, he asked us to tell all of our people to put God first. Although my loved ones are gone, the scriptures they gave me are my weapons, strength, and power that carry me through each day.
The first experience I want to share took place in July, 1991. There was a severe storm that caused destruction of our school. Our friends abroad sent us donations to buy food and replace books and items that were lost. The second experience happened on January 29, 1997. The Democratic Karen Buddhist Army (DKBA) invaded our refugee camp and there was a battle for a short time. Two people died because of the explosion of a rifle grenade. The third experience followed on April 28, 2012. A fire broke out and there was nothing left of our Kawthoolei Karen Baptist Bible School and College (KKBBSC). Although we lost everything, no life was lost by God’s grace. The fourth experience was the loss of my husband, Dr. Simon, who was called home by his heavenly father, on August 2, 2015. He peacefully left the Bible school, his people, and his family that he loved so dearly. For our family, the loving tie that bound us together broke and we felt a deep sense of loss and loneliness in tears for days and nights. We are grateful to leaders and brothers and sisters from all over the world for praying for us and sending us generous donations. May the Lord bless you abundantly.
Now I live in Arkansas with my middle child, Thaw Poe, her husband, Poe Si, and their daughter, Cha Koo Ku. Cha Koo Ku’s parents go to work early in the morning. There are times when I would still be in bed feeling lonesome and heavy. Then I would hear the footsteps of Cha Koo Ku, only three years old, running to my room. She would shout out, “Pee Pee Htoo” and that would bring me joy and take away the heaviness. I would get up and kiss her. We always eat fried rice with eggs for breakfast. We pray together. She recites Bible verses and sings. She is active and happy all day long. Sometimes, I cry and she laughs so I don’t want to cry anymore. I think God wipes away our tears in so many ways. Now, I have two more grandchildren, Thaw Thaw’s son and Paw Paw’s daughter. I learned from babies that they cry out when they need something and their mother fulfills their needs and they get quiet. Likewise, I know God is meeting my needs. He preserves my life among the living. The Lord gives me joy in ways that no humans can.
Thramu Ta Blut Htoo (Moe Htoo)
Lamar, Arkansas
REFLECT
Everyone experiences losses in their lives. When we lose our homes, possessions, safety, and especially our loved ones, may we remember that God preserves our lives among the living and turns our sorrow and worries into comfort and strength. We also need to encourage others, especially our children. May we love them and hug them with the word of God. May we continually pray for them, so “our sons in their youth will be like well-nurtured plants, and our daughters will be like pillars carved to adorn a palace.” (Psalm 144:12)
The gifts of three scriptures encourage Moe Htoo. Which scriptures encourage you the most?
Moe Htoo feels comforted through her grandchildren. In what ways do you feel comforted?
Have you testified of God’s miraculous work in your life for His glory?
PRAYER FOR THE READER
Father in heaven, I pray that You will bring comfort to Your children, who are reading this devotional, and whisper to them with Your gentle voice. May You be their comforter just as You comfort me through my three grandchildren and friends, who love me and pray for me. If Your children are experiencing unbearable suffering or losses, please send your angel to bring them peace and comfort, just so one day they can share with others the miraculous work You have done in their lives. In Jesus’ Name, I pray. Amen.